Waat ’n avontuur woor dit! Woeë mot ich beginne.

Mam haaj ’n vergadering, zoeë as zoeëvöl, mette dames van de Jeugdbegeleiding. Ich mocht d’r wul efkes beej zitte mer dan nao boeëve um ze neet te stuuëre. Gehieël onverwachs kreeg ich toen de vraog of ich neet ’n stökske oppe piano kos spuuële en hun haaje de blaatmeziek beej zich. Inne tekst stông de vraog of ich dit jaor de Jeugdpreens woeëj waere beej De Schäöpkes.

Det kwoom zoeë as ’n verrassing det ich d’r stil van woort. Mer nao ’n tiêdje kos ich dao volmondig jao op zegge.

Ich wist al snel weem mien adjudânte zoeëje waere en gelökkig zagte Damian en Johan drek jao.

Waat waas ’t ontzettendj spannendj, leuk mer vörâl gezellig as det ’t hieële gezelschap enne begeleiding weer kwoome. Waat es d’r völ gelache en bedachtj. Same met mam mien ôngerschei-jing bedînke en uutwêrrikke en met pap en mam mien kedootjes bedînke en in mekaar knutsele en elleke aovundj de speech oefene.

Toen woor de uutrooping dao. Ich waas op vanne zienuwe mer haaj d’r vörâl ontzettendj völ zin in. ’t Wegsluipe uutte zaal, umklei-je en inne baolderker klumme um ouch de minse di-j ich d’r gaer beej woeëj hebbe, mer achter de bar stônge, d’r beej te krieëge. Echt hieëlemaol nemus haaj ’t ouch mer doeër gehatj. En waat woor ’t vör eedereîn ’n groeëte verrassing det ich dao stông. Echt hieëlemaol nemus haaj ’t ouch mer doeër gehatj.

Nao efkes tot röst te zeen gekaome en vae os haaje umgekletj woor ’t memênt dao det ich mocht gaon speeche en waat ging det ontzettendj goot. Nemus wis det ich stiekum hieël goot Wieërts haaj lieëre laeze en spraeke. Zoeë gruuëts wi-j ‘ne pâw wi-j eindelik mien ôngerschei-jing woort getoeëntj en ich eindelik as Jeugdpreens Tijn I vuuërop mocht gaon in de polonaeze. Ich woor neet kepot en nao hoês te krieëge. Waat ‘ne top aovundj woor det!

De vollegendje mêrrege kwoome ze de prachtige banner plaatse en haaje vae de brunch. Nao ’n lekker kedètje mocht ich eederein ôngerschei-je in mien “Orde van ’t stuiterendj pianospuuëlerke”

Op Debuut mocht ich ouch aanwieëzig zeen as Jeugdpreens Tijn I

en ich mos zellefs ’t Limburgse Volkslied zînge. Gelökkig haaj ich ’n spiekbreefke want det stieët neet op miene Spotify lieëst

In jannewarie begos ’t pas echt, alle resepsie, booreballe, preensetreffe, intervjoews, fieësjes en de optocht. Waat waas det gewêldjig. Ich vong ’t echt allemaol eîn groeët fieëst.

En det ich met miene hieële Jeugdraod ieërst beej Aan de Bron, toen nao de Maaskei en as klapstök nao mien eige schoeël mocht, woeë ich ouch nog mocht speeche en ’n aantal lieërkrachte en klasgenoeëte mocht ôngerschei-je in mien orde

En toen woor ’t zoeë wieët, de dieënsdig brook aan en waat haaj ich dae gaer oeëver wille slaon. Ieërst ’t Zonnebuizersbâl, waat echt hieël leuk woor mer toen de abdiekasie. ’t Begos met ’t Schäöpke oplaote same met Miranda en daonao os foto ophânge in oeës Preense galleri-j.

En toen woor echt ’t onvermijdelikke memênt dao. Ich heb geprebieërtj um miene speech zellef vuuër te laeze mer det lökdje mich echt neet. Dus det hieëf mam vör mich gedaon. ’t Woor een meujlik mer ouch schoeën memênt en vae hebbe ’t nog dek trök gekieëke

Al met âl bin ich super dânkbaar det ich de kâns heb gekrieëge um Jeugdpreens Tijn I te zeen beej V.V. De Schäöpkes.

’t Woor ’n super schoeën ervaring di-j ich de rest van mien laeve zâl koestere.

Same met mien adjudânte Damian en Johan, pap, mam, Noëlla, Samantha, Brian, Levi, Carin, Remco, Lizette en neteurlik MIEN dames van de Jeugdbegeleiding, Raod van 11 en Jeugdvorst Dani hebbe vae d’r eîn groeët fieëst van gemaaktj, bedânktj heej vör.

En ich wil gaer Landvrâwe Miranda en gevolleg, De Schäöpkes en Alaav nog ‘ne kieër bedânke vör dies fantastische ervaring.

DANKE, DANKE, DANKE

Groetjes, Aod Jeugdpreens Tijn I