Histoeries oeëverzicht van V.V. De Schäöpkes.

Vör de oprichting van V.V. “De Schäöpkes” motte ve in feite trök nao november 1962. ’t Groenewoud woor toen nog ’n jong wijk en ut gevaor dette wijk in buuërtschappe uut ein zoeëj valle woor zieëker neet dînkbieëldjig. Un toendertiêt gehaoje”Ceciliafieëst” van ’t kêrkelik zângkoeër, woor ’n gewêldjig sukses en mede op iniesiatief van de toenmalige pestoeër van Hees ester toen ’t iedee geoppertj um zoeë wat eeder jaor te doon. Eeder jaor ’n groeët fieëst woeëop alle bewoeëners van ’t Groenewoud beejein koste kaome. Al gaw weurtj d’r besloeëte um ’t ein en d’anger in de vastelaovundjsfeer te laote plaatsvînge, dan zeen de minse mier uutgelaote en weurtj d’r ierder ‘ne bând gesmieëtj. Zoeë gezagtj, zoeë gedaon. Dieverze persoeëne zeen benadertj gewoeëre en al op 23 november ginge ze offiesjeel van start as vastelaovundj vereiniging “de Dorstige Schapen” en weurtj Sef Fiddelers, op ’t ieërste Schäöpkesbâl, in zaal ROFESTA oppe Beest uutgeroope as Landhieër 1963. Nao ein sezoên te hebbe gedrejtj vônge ze ut um allerlej rieje toch baeter umme naam te verangere in V.V. “de Schäöpkes’ en zoeë heite ve noow nog altiêt.

Oppe ieërste plaats es de parochiekêrrik van ’t Groenewoud towgewietj aan “de Goede Herder” en umdet de toenmalige Pestoeër van Hees ein vanne iniesiatiefnemers vanne vastelaovundj vereiniging woor, weurtj hem as hoeëgste gezagsdrager in oeës wijk de ieëre-titel op Opper Herder towbedeîltj, hae woor herder oeëver zien Schäöpkes en zoeë es de naam “de Schäöpkes”ontstânge.

Angers dan de optochtvereiniginge es V.V. “de Schäöpkes” ’n echte wijk vastelaovundjvereiniging. Dao waere jaorliks dieverze vastelaovundj aktievieteite vör de wijk georganiezieërtj met as hoeëgtepeunt ’t Schäöpkesbâl mette uutrooping vanne nowwe hierser oeëver de wijk Groenewoud, de Landhieër. Landhieër es ‘ne ângere naam vör Preens en umdet vae os oppe ieërste plaats “Rogstaekers” veule enne Rogstaekerspreens as Preens vör hieël Wieërt beschouwe, es det de rede det vae gekoeëze hebbe vör de naam Landhieër, ouch es de Landhieër hieërser oeëver völ lând woeëop de schäöp laeve. Ouch hebbe vae geine Vorst mer ‘ne Vuuërzitter. As wijk vastelaovundjvereiniging vînge vae det ve de taak hebbe umme minse vuuëraaf al ’n bitje op te wërreme vör de groeëte vastelaovundjviering en doeër oeës aktievieteite prebieëre vae de verstândhaojing in oeës wijk te bevordere.

Zoeë as ierder beschrieëve es ’t ieërste Schäöpkesbâl gehaoje oppe Beest. ’t Jaor daonao ginge ve vanwieëge de enorme towloup nao ’t St.Joeëzefsgebouw oppe Wihelminasingel, dao ligktj noow de Bieb. Inne begînjaore weurtj de Landhieër beejgestânge doeër “Houtvesters” en versieërtj met ‘n “Freule”, di-j as Adjudânt fungieërdje. In dae tiêt waere ouch de bekindje “Zittinge” met tal van bekindje artieste o.a. Pierre Knoups, Ton Jorna e.d. gehouje. De Hofkepel vanne “Zweeloeëre” ônger leiding van Cis de Kapper zörrigdje vör de meziek en ’t woor duuëdelik dette Vastelaovundj laefdje in zoeëwaal ’t Groenewoud as in hieël Wieërt want eedere kieër woor de zaal bezatte totte leste plaats. Um ouch aanne nuuëdige fienansieje te kaome vör de ieërste daelname aanne optocht inne stad, weurtj in 1967 i.s.m. de Wieërter Hermeni-jje St.Joeëzef en St. Antoenius un geldj inzamelingsaksie gehouje in ’t Groenewoud. Met dit beejein gebrachtj geldj bouwdje ze aan ’t motto “Hieël de wêrreldj veertj Vastelaovundj”.

Det ze d’r toendertiêt gruuëts op ginge um as aktieve vereiniging te waere aangemêrriktj, blieëktj uut ’t verzeuk um toenmalige Menister van Boeëtelandse Zake Mr. Joseph Luns uutte nuuëjje vör de “Zitting” , mer de Menister mos aafzegge doeër ânger verplichtinge. Inne jaore 1966 en 1967 weurtj d’r rônd 11 november “Buutredeners” aovundje gehaoje in ’t St.Joeëzefsgebouw en di-j woore ’n gewêldjig sukses. Inne zieëventiger jaore moste ze noeëdgedwônge, i.v.m. ’t aafbraeke van ’t St.Joeëzefsgebouw verhoeëze nao zaal “Everaers” aanne Remundjsewieëg. De ruuëmdje woor neet al te groeët mer doeër minder groeëte aktievieteite woor dit ouch neet mier zoeë noeëdig.

In ’t jaor 1973 weurtj ‘t 1x11 jaorig bestaon gevieërtj met vör dae tiêt’n groeëte resepsie en as Jubieleejum Landhieër ester gekoeëze vör Cor vanne Bosch. In 1975 weurtj d’r weer verhoêsj en noow belandj de vereiniging in Zaal “Apollo” inne Bieëkstraot. Mer ze woore doeër dieës, oeëveriges zieër gastvreeje, lokaasie weer verder vanne wijk Groenewoud aaf, mer toch blieëve de vaste bezeukers trouw, in groeëte getale, de aktievieteite bezeuke. ’t Bestuuër blieëftj naarstig op zeuk nao ’n lokasie di-j dichter beej “hoês” gelaege es. Ze vônge de oplossing in 1978 in Cafe Zaal ‘t “Groenewoud” gelaege aanne grens vanne wijk oppe Graafschap Hornelaan, In 1981 waere d’r vreendschapsbande aangeknuiptj mette Bèlze vereiniging de “Bocholter Papbugels” en tot op hede waere di-j oeëver en wier steeds weer aangehaaldj ônger ‘t genot van ‘ne gooje pot Bèls of Limburgs beer.

Dieës jaore blieëke in allerli-j opzichte roerige jaore te waere. In 1983 weurtj ’t Gemeinschapshoês Groenewoud aanne Kesselstraot gerejaliezieërtj en weer kan de verhoêswaage vuuër kaome ri-jje. Hoeëpelik vör de leste kier want op ’n eige “home”, midde inne wijk, wachdje ve al jaore. 1984 zâl ingaon as ’n bezeundjer jaor, want in ’t now home weurtj met Landhieër Wim Hendriks aan ’t roer, ônger groeëte belangstelling ‘t 2x11 jaor bestaonsfieëst gevieërtj. Oeëver belangstelling haaje ze neet te klaage want nao eenkele oore resepsie bleek dette lokaasie noow al te klein woor. Vör ’t ieërst weurtj d’r inne Perochiekêrrik ’n Diejalektmès gehouje ônger de naam “Boorekeele Mès” en tot op hede ester eeder jaor nog zoeën vieëring, ônger leiding van oeëze “Opper Herder”, mer waal inne kêrrek van Luuëke . Ouch kindje de vereiniging dieverze aksies di-j haart noeëdig woore umme kas te spekke. Zoeë waere d’r hoês aan hoês appels verkochtj, waere d’r vloeëjje mêrrendje en ’n voetbaltoernooj georganiezieërtj en waere d’r eenkele jaore de bekindje kefeevoetbaltoernooje gehaoje. Eeder jaor vanaaf 1982 verschieëntj dao ’n programmabukske det gehieël gratis inne wijk weurtj bezörrigtj. Verschillendje persoeëne hebbe inne loup d’r jaore de vereiniging as vuuërzitter geleitj mer Dhr. Bert Minkels woor toch de persoeën, dae de vereiniging ´n eige gezicht gegaeve hieëtj in de ruuëm 14 jaor van zieën Vuuërzitterschap. Onger zien bezieëlendje leiding waere d´r verschillendje aksies vör de Perochiekêrrek gehaoje. Zoeë zatte ve os in vör geldj beejein te brînge vör de reperaasie van ´t Kêrrekdaak, vör de aanschaf van ´n Lôwklok en waere ve aktief beej ´t zilvere bestaonsfieëst vanne perochie in 1987. ve woore de iniesiejatiefnemers vanne in 1989 en 1990 gehaoje kienaovundje vör de renovasie vanne Körststâl. Meediejo 1988 broeëke d´r vör os zoeë goot loupendje vereiniging zwaor ti-jje aan. Nao eenkele meiningsverschille troeëj ´t bestuuër aaf en haokdje d´r verschillende lede aaf. Vlak vuuër de Vastelaovfundj 1989 waere de hâng ineingeslaage en in stêrrek aafgeslânkdje vorm weurtj d´r toch ´n waardig Vastelaovundjsfieëst gevieërtj.

Begîn 1990 weurtj ´n now bestuuër gekoeëze en weurtj besloeëte um as offiesjeel vereiniging doeër te gaon. Staatuute waere bekrachtigtj en ve waere ingeschrieëve inne Kamer van Koophandel. Ouch meldje vae os aan beej ´t BCL, Bônd van Carnevalsvereiniginge. Ouch op soosiejaal vlak waere ve weer aktief, ve bedachte ´n stein aksie vör ´t Credo zaelke beej de Kêrrek. In 1990 deejje ve vör de leste kieër, nao 24 jaor, mej aanne Rogstaekersoptocht. Gebrek aan mankracht en bouwruuëmdje looge heejaan ten grôndslaag. Dette vereiniging trouw leede waardieërtj blieëktj in 1991 toen de vereiniging twieë persoeëne beneumdje tot Ierelede vanne vereiniging te wieëte dhr. Cor vanne Bosch en Arno Smeets. Toch kwoom d´r in 1991 ´n schaduw oeëver de Vastelaovundjveering, de Vastelaovundj weurtj aafgelasj vanqieëge de Golfoeërlog in ´t Midde Oeëste. Doeër dieës aafgelasting haaj de hieërsendje Landhieër Math van Heur waal de priemeur um twieë kieër Landhieër te zeen. Dette vereiniging duuëdelik inne lift zitj blieëktj uutte oeëverwêldjigendje belandstelling beej oeës aktievieteite. Al acht jaor organiezieërdje ve in saamewêrreking met Polleke en Wullemke ´n Blaosspektaakel vör Boorehermeniekes en Joekskepelle met deilnaame uut hieël Limburg, jao zêllefs uut Remundj. Heej kinne ve spraeke van ´n gewêldjig sukses. Sukses haaje ve ouch oppe vuuëraovundj van Kuuëninginnedaag 1994 toen ve inne “ Poort van Limburg” vör de ieërste kieër ´n “ Oranjebâl” heele met artieste as Beppie Kraft, Duo Difference en Joekskepel “ Kappes Moos”. De opbrîngste van dieëze aovundj zeen vör de aanschaf van now steeke, di-j ve vör ´t ieërst op oeës 33 jaor jubieleejumfieëst aan ´t pebliek zulle toeëne.

Inne loup d´r jaore hieët de vereiniging ´ne gooje bând opgebouwtj mette dieverze vereiniginge en instânsies inne wijk. Zoeë organiezieërdje ve saame met Stichting Vrije Jeugd en V.V.de Lieëg-gengers jaorliks op Vastelaovundjdiênsdig de hosmêrrige vör de kliejènte van ´t daagverblieëf “ ´t Zonnehoês” det inne wijk es gevestigtj en ouch de “ Wichteroptocht” vanne John F. Kennedyschoeël weurtj eeder jaor opgeloeësterj doeër heej aan mej te doon. Midde inne 80er jaore waere de Schäöpkes muziekaal begeleidj doeër kepel “ eige Wiês” , vanaaf 1991 vergezêldje eenkele jaore Kepel “ de Schoeën Waer Blaozers” de vereiniging op passendje wieëze. Zieër gooj kontakte hebbe ve ouch met Stichting Gemeinschapshoês Groenewoud en ve zeen dan ouch ´t bestuuër zieër erkintelik vör de inne loup der jaore ontstânge prettige saamewêrreking. Bekans zônger uutzôngering kieëke de Landhieëre vanne Schäöpkes trök op ´ne tiêt dae ze neet haaje wille misse. Nog gaer vertelle ze oeëver eur belaevenisse en as ve ze motte geluîve woor ´t jaor det ze Landhieër woore, ´t beste Vastelaovundj jaor tot noow tow. Meschien ligtj dao in de rede vör de oprichting vanne Aod Landhieëre Klup in 1992. ongewtieëgeltj zulle ze oppe aovundje di-j ze haoje nog völ annekdootus, al dan neet op waorheid beröstendj, oeëver eur belaevenisse verteldj waere.

D´r woor weer storm op komst, ´t woor ´n kaome en gaon van leede binne de Schäöpkes. Dao doeër kwoom d´r twieë spalt inne vereiniging enne helft vanne leede goof d´r de brui aan. Gooje raod woor deur. Nao ´n goot gesprek weurtj ´ne doeërstart gemaaktj mer ´t jaor dao op woor ´t weer mis. Zoeë errug zêllefs detter in ´t Groenewoud spraake woor van geine Vastelaovundj. De in allerijl beejein geroope Aod Landhiere Klup woore ´t vlot eins, ´t mos doeërgaon. De tiêt woor te kort um ´ne nowwe Landhieër aan te stelle, darum weurtjer besloeëte um ´n Aod Landhieëre Bâl te haoje. Völ posietieve reejaksies vaane zöstervereiniginge woor de aanzet tot ´t röstig opbouwwe van wat nows. Op kêrmus dieënsdig troffe zich toevallig ´ne aod Landhieër en twieë fanatieke vastelaovundjminse uut ´t Groenewoud zich beej Lambèr Wijnen en dao weurtj oeëver de vastelaovundj in ´t Groenewoud gekaltj.´s angerdaags weurtj direkt aksie ôngernoeëme en nog ´n paar anger minse d´r beejgehaaldj. Uut alle geledinge van ´t Groenewoud waere minse benadertj um zitting te neeme in de now te vorme stuurgroep, aod Landhieëre, de Wijkraad enne Buurtvereiniginge. Aanne dre-j nog zittendje leede vanne Schäöpkes weurtj uutgelagtj wi-j ve inne toekomst verder zulle gaon. Dao weurtj ´n now bestuuër en wêrrekgroepe gevormtj. Ve haaje € 0,00 oppe bank., twieë soeërte aoj steek vör de Raod van Elf en ´n paar medaalies. Vör de Landhieër geine skepter en mantel, dae kreege ve in broeëklieën van Leike Soudant. Ve haaje waal minse di-j verder woeëje mette vastelaovundj in ´t Groenewoud, det woor ´t vörnaamste. Det dit goot aansloog weurtj bewaorheidj in 2004 toen de Schäöpkes de Wichtervastelaovundj oeëvernoeëme van Stichting Vrije Jeugd di-j völ vertrouwe haaje inne now vereiniging. Heejdoeër weurtj de hieële vastelaovundj in ein vereiniging saamegevoegdj. Vanaaf det memênt zeen ve gaon bouwe aan ´n gooj gezonde vuuëruutstaevendje vereiniging, de dames vanne leede vanne vereiniging waere ouch lid umdet di-j inzetbaar zeen op alle fronte, jao zêllefs in ´t bestuuër. Nao oeës 4x11 jubieleejum in 2006 zeen ve begonne met DeBuut, ´ne jaorliks trök kaomendje aovundj van Buuteredeners. ´t Ieërste jaor gehaoje in Gemeinschapshoês Groenewoud vör 350 persoeëne. Det woor zoeë´n daverendj sukses det ve noow zitte aan twieë aovundje van totaal 1200 persoeëne inne aoj Kêrrek van ´t Groenewoud. Dit alles resultieërdj inne vereiniging di-j d´r op dit memênt stieët. Un vereiniging van 50 persoeëne di-j wiltj prebieëre de vastelaovundj in ´t Groenewoud uut te draage en te stiemulieëre, met eure stuuën en mejwêrreking zâl det zieëker lökke.

Ouch hebbe ve hieël völ te dânke aan ´t groeët aantal sponsoren, advertieërders en begunstigers, di-j ´t muuëgelik maake dette vereiniging eeder jaor weer vör de Groenewoudse minse ´n aantrekkelik programma kinne presentieëre. Vae spraeke dan ouch de wîns uut dette minse van ´t Groenewoud, de Schäöpkes zulle stuuëne doeër aktief deil te neeme aanne vastelaovundj aktievieteite, zoeë det ´t streeve van V.V. De Schäöpkes um de verstândhoujing inne wijk te bevorderen, op ´n gezellige en ongedwonge wieëze inne loup d´r jaore nog mier gestalte zal krieëge. Unne gooje Vastelaovundj

Unne gooje Vastelaovundj!