Jeugdprins Bekintj 2025!
In ’t Groenewoud es zaoterdig 23 november op ’t Lemkesbâl in ’t gezellig en sfeervôl Gemeenschapshuis Groenewoud de nowwe
Jeugdpreens van V.V. De Schäöpkes uutgeroope. ’t Es de 11 jaorige Tijn van de Wiel, zoeën van Mischa van de Wiel en Sandra Hendriks.
Same met pap, mam, pleegzäösterke Noëlla en hoond Bram woeëntj hae in Ittervoort. Ittervoort? Jao Ittervoort! Hae es namelik ’n echt
Schäöpke. Zien mam es al 18 jaor lid en Jeugdbegeleidster beej de Schäöpkes. Jeugdpreens Tijn es dus al vanaaf zien geboeërte ellek jaor op ’t Lemkesbâl gewaesj en det kinne neet völ minse zegge.
Hae es lieërling in groep 8 aan Basisschool Cluster “HIN” in Ittervoort. Zien hobbies zeen neteurlik Vastelaovundj veere, kickbokse, piano spuuële en ouch kampieëre deut hae gaer. Hae vingtj ’t feîn um met zien kammeräödjes aaf te spraeke en es gek op game.
Zien adjudânte di-j hem met dieës drökke daag beej zölle staon zeen zien kammeräödjes Johan Meuwissen en Damian Stienen. Zien orde ès: “de Orde van ’t stuiterendj pianospuuëlerke” en same zölle ze de jeugd in ’t Groenewoud vuuërgaon ònger zien devies:
“Ich bin noow meschien ver van hoês, mer beej de Schäöpkes veul ich mich pas echt thoês”
Jeugdpreens Tijn I weensj eederein “unne gooje Vastelaovundj”