Ich zâl de daag noeëts mieër vergaete wi-j de dames vanne Jeugdbegeleiding mich kwoome vraoge. ’t Woor net vuuër de zoeëmervekânsie en ’t woor blootheit Doeër middel van ‘ne mok met snuik en ’n verrassingseîke met ’n breefke d’r in. Heej stông op: Dani wildjae oeëze Jeugdpreens zeen beej V.V. de Schäöpkes? Dao hoofdje ich geîn menuut oeëver nao de deenke en antwoeërdje drek… Jao det wil ich!!!

Nao ’n paer waeke alles te laote bezînke, koste de vuuërbereidinge beginne. Zoeë ouch mien medaalie woeë ich ontzettendj gruuëts op bin. Ich heb um zellef geteîkendj. ’t Mos ‘ne kiepers-haos waere met mien lievelingsbieëste d’r op. En hae es precies gewoeëre wi-j ich ’t gaer woeëj

Ouch wist ich weem ich zoeëj vraoge um mien adjudânte te waere. Mien naefke Ryan en mien voetbal kammeräötje Luuk. Gelökkig zagte ze dao allebe-j jao op! 

Toen kwoom de daag van de uutrooping. Ich woor hieël relaxed en ontspanne. Ich keek d’r echt nao uut um mich te moge prizzentieëre. Verkledj as aap stông ich te wachte tot ’t momênt dao woor. Wi-j ich eindelik in de koeëj de zaal in mocht begos de spanning wul ’n bitje te kaome. Eigelik wist ich neet mieër waat ich mos doon mer heb ’t allemaol laote gebuuëre. Wi-j de dames mich uutgeroope haaje as Jeugdpreens veel alle spanning weer weg. Dao stông ich dan as Jeugdpreens Dani I. Miene droûm woor uutgekaome. Allebe-j mien oma’s woore hieëlemaol verrasj. Schoeën um aan trök te deenke. Mer nog schoeëner woor wi-j de Landhieër Marco bleek te zeen. Det zeen gooj vreende van os dus dit mos wul ’n topsezoên waere

De daag nao de uutrooping woor de brunch. Ouch det waas hieël gezellig en feîn um met z’n alle beej mekaar te zeen. Op Debuut mocht ich mich same met Marco vuuër stelle aan ‘t publiek. Det woor leuk um te doon.

En in jannewarie kos eindelik ’t fieëste beginne.

Vae stardje beej TV11 en ich woor êrreg verrasj det ich ’n medaalie kreeg van Preens Luc I van C.V. de Halleve Gare uut Buggenum. De resepsies vông ich wat minder mer di-j huuëre d’r now einmaol beej. ’t Allersjiekste vông ich mien eige resepsie. Waat heb ich ongeluifelik völ gekrieëge. Echt te völ um op te neume mer ich kân zieëker ’n jaor snuike 😉. Vastelaovundj vriêdig mocht ich, oppe doeër os pap gemaakdje ker, doeër de straote van ’t Groenewoud trekke. Ouch de Jeugdraod stông d’r op. Zellefs mien vriendinneke Lynn mocht met os met

En toen brook de onvermijdelikke dieënsdig aan. Ieërst nog ’t Zonnebuizersbâl en ‘ne lekkere lunch. Daonao same met Marco de Schäöpkes op laote en os foto’s ophânge aanne Wall of Fame in ’t Gemeinschapshoês. En toen mos ich d’r toch echt aan beginne. De abdikasie…… ’t Woor jaomer mer ouch weer ’n bitje bli-j dette drökke tieëd vörbeej woor. Gelökkig sloote vae de daag aaf met heerlik aete vanne frietker en woortj echt gedaon.

Dânkbaar bin ich dette Jeugdbegeleiding, mer ouch oeës pap en mam mich de kâns hebbe gegaeve um Jeugdpreens te moge waere. Aod Adjudânte Luuk en Ryan, Aod Landhieër Marco II, zien gevolg, de Jeugdraod, Aojers, Jeugdboorebroêdspaar, Alaav en Schäöpkes bedânktj dejje mich op hâng hetj gedrage. Ich kiek trök op ‘ne ke-j schoeëne tieëd dae ich neet haaj wille misse. ’n Prachtige bladzijde in mien laevesbook!

Groetjes, Aod Jeugdpreens Dani I