Op ‘t Lemkesbâl van V.V. De Schäöpkes van ’t Groenewoud es aafgeloûpe zaoterdig 25 november ’t Jeugdboorebroêdspaar bekintj gemaaktj

t zeen gewoeëre:

Luka Jacobs en Yana Bouchet

‘t Bruûdje Yana woeëntj aanne van Bommelstraot en es ’n dochter van Raf Bouchet, alias dae Bêls en Kim Corstjens-Lenaers van Crix Meister en Jang van Botterdoeër. ’t Es 9 jaor aod.

Yana hultj van ’n grepke en stieët al 4 jaor met völ belaeving in ’t Meûnttheater vör de uutveuring van Dânsschoeël Release. Net as zien 4 zösters en broor hultj ’t êrreg van meziek en vollegtj ’t keyboard les beej RICK Raaktj.

’t Hultj och van knutsele, skeete en spelletjes.

En al vuuërdet ’t snapdje waat de Vastelaovundj beteîkendje, verkledje ’t zich gaer âl daag. 

De broêdegom Luka woeëntj oppe Groenewoudlaan en es 9 jaor en hieëf ’n breurke Bodhi van 8 jaor.

Hae es ‘ne zoeën van Roland Jacobs van Francien van Toos van Helemus en Tjeu vanne Minister en van Bèr van Scheur Thjeu en Hoote Miet en van Marie-Louise van Gansewinkel van Tonny van Jan van Kuub van de Buus en Mia van Schreur Pietje en van Jac van Toon van Huupke en Lies van Stoffele Toon. 

Luka voetbaltj gaer, mer helaas nog neet beej ’n klup. Dit keumtj umdet hae aan ’t indj vanne vekânsie zieëne êrrem hieëf gebroeëke en zoeë gâw as dieëze genaeze es gieët hae d’r vôl vör. Verder hieëf hae alle aandacht vör alle soeërte schêrreme.

Ze zitte allebe-j in groep 6 van Baazisschoeël “Aan de Bron”

Op 20-01 a.s. zölle ze inne onecht waere verbônge doeër Jeugdhoeëgheid Dani I

Vae wille uch dan ouch van herte uutnuuëdige um dit fieëst same met os te kaome veere. De aovundj begintj um 19.11 oor en deurtj tot 23.00 oor. Dit alles zâl plaats vînge in Gemeinschapshoês Groenewoud, Kesselstraot 28

De entree es gratis!!