In ’t sezoên 2022/2023 woor ich de Jeugdprens van V.V. de Schäöpkes.

Waat waas det ’n gewêldjig sezoên!

In 2021 haaje de dames vanne Jeugdbegeleiding al kontakt gezochtj met mama um te vraoge of det ich eventuweel interesse haaj um inne Jeugdraod te kaome. Det woeëj ich wul. Neteurlik haaje vae dit effe beej Oeëme Patrick nao gevraogtj of dit kos umdet vae ouch lid zeen van V.V. Vreug of Laat. Nao de jao stônge de dames inens oppe stoep um zoeëgenaamtj efkes beej te kalle. Einmaol binne kreeg ich ‘ne ballon en dao mos ich kepot prikke. Allemaol konfettie oppe groônt!!! Inne ballon zoot een breefke mette vraog of ich de Jeugdpreens van V.V. de Schäöpkes woeëj waere!! Ich woor hieëlemaol oeëverdondertj doeër de vraog en mos d’r effe oeëver nao dînke. Uuteindelik woort ‘t ‘ne JAO! Vanaaf dae tiêt ginge vae aanne slaag. Same met papa de medaalie ontwêrrepe, adjudânte vraoge en eedere waek speeches oefene en ’t verzinne van ’n spektakulaire uutrooping. Alles woor klaor en geregeltj, allein corona zörregdje d’r vör detter niks doeër kos gaon, mer dan mos ich wul ’n hieël jaor miene mônt haoje! En det es gelöktj!!

Nao de groeëte verkânsie kwoome de dames weer en ginge vae weer verder woeë vae woore geblieëve. In november woor ’t zoeë wieët en waerdje ich uutgeroope as Jeugdpreens. Waat waas det vör eederein ’n verrassing. Eindelik mocht ich mien medaalie laote kieke en gaon fieëste. En waat vör ’n fieëste hebbe vae gehatj, tevöl um allemaol op te neume. Os eige Jeugdboorebâl vông ich wul hieël gaaf umdet mien naefke Ryan same met Senna ’t Jeugdboorebroeëtspaar woore. Mien eige resepsie woor ouch êrreg leuk….. en waat völ kedoos en snuik hebbe vae gekrieëge. ’t Jeugdpreensetreffe en ’t Vastelaovundjbâl van schoeël woore ouch ke-j gaaf! Van schoeël uut vertrokke vae in ‘ne stoet met eige kreasies nao ’t Gemeinschapshoês op ’t Groenewoud um dao te gaon fieëste….. zellefs ’t Jeugdjournaal kwoom kieke en filleme.

Vastelaovundjmaondjig hebbe vae nog mette Jeugdraod en mien gevolleg met geloûpe inne stad, met ‘ne eige waage gebâwtj doeër pap en ’n paar vreendje. Vastelaovundjdieënsdig woor mien abdiekasie en mos ich alles weer inlevere en woor ich weer gewoeën Dilan. Waat heb ich genoeëte en zâl dieëze tiêt noeëts vergaete. ’n Schoeën pagina in mien laevesbook met herinneringe.

Dânkbaar bin ich V.V. de Schäöpkes det ze mich gevraogtj hebbe as Jeugdhoeëgheid. Dânke Dani en Douwe dejje mien adjudânte wildje zeen! Zônger uch woor mich dit noeëts gelöktj. Dânke papa, mama en Dez dejje dit vör mich hetj wille doon. Dânke dames vanne Jeugdbegeleiding vör eur gedäöltj, tiêt en höllep met alles! Dânke Landhieër Floyd I, det ich same met uch vuuërop mocht gaon op ’t Groenewoud. En vör eederein dae ich vergaete bin……… Dânke, dânke, dânke!

Ich wil de nowwe Jeugdhoeëgheid hieël völ sukses weense in ’t aankaomendje sezoên. Weem det weurtj es nog ’n groeët geheim en dao zölle vae pas op 25 november achter kaome!