We-j de Schäöpkes vrooge of ze oppe koffie koste kaome, haaje vae un vermoede det ze vör miene mins Eric kwoome. Groeët waas dan ouch oeëze verbazing det det neet ut gevâl waas, mer det ze vör mich kwoome met de vraog of ich de allerieërste vrâwelikke hoeëgheid vanne Schäöpkes wooj waere. Dao hoofdje ich neet lang oeëver nao te deenke en nao waat uutlegk oeëver waat ut ammaol inheel zag ich volmondig JAO!

En begos ut, unne orde, un devies, de medalie, en ut allerbelangriekst, mien adjudândtes, Esther van Berkel en Irene Donkers-Bors, de-j gelukkig alletwieë ouch volmondig JAO zagte!

Mer we-j moste ze mich gaon neume? Landvrâw, nein, det es un boorin. Preenses? Nein de Schäöpkes hebbe unne Landhieër, dus dao mot ut waal beejpasse. Landdame, nein, det kleenktj ouch neet. Landvrâwe dan? Det kloonk waal good adellik (deenk aan Kastieëlvrâwe, des ouch adellik). Det mos ut waere!

En waat trek ich aan? Un pak en un steek met vaere of un kleid met un kruuënke? Ich bin vrâw dus ich koeës vör ut leste.

De uutrooping mos un groeëte verrassing waere. Oeës manne waerdje op ut podium gezatte met un schaopsmasker op en bestoeëktj met vraoge. De speculasies ginge al doeër de zaal, ut zal Eric waal zeen. Naodet bleek det geîn van de manne de noowe Landhieër waas, waas ut onrustig inne zaal en ging de volgspot de hieële zaal doeër um te eindige beej mich, waat un geveul waas det! De hieële zaal ging los en toen kos ut beginne! Kleid aan en toen de installasie van mich en mien adjudântes. Waat hebbe vae genoeëte van de tiêd dae daonao kwoom!

Van recepsie beej verschillendje vereiniginge, wis Boorebâl vanne Schäöpkes met de Dröppelkes, Preensetreffes in Swartbrook en Remunj, de groepsfoto van alle hoeëghedes van Wieërt en umgaeving, de schoeëleoptocht van Aan de Bron en bezeuk aan kammeräöj, de-j geîn vastelaovendj koste veere vanwege gezoondheid. Met as absoluut hoeëgtepûnt oeës eige recepsie! Waat un fieëst waas det! Waat woor ut drök! En saame mooge zeenge met Stefan Wolter, e-j sjiek!

Wieter heb ich ut hieële seizoên genoeëte met en van oeëze Jeugdpreens Tijn I en zien adjudânten, zoeëvöl sjieke dinger me-jgemaaktj! Dit hieët un bând gescheptj vör ut laeve!

Schäöpkes, Alaav, Esther en Iren, oeës manne Eric, Henk en Roy, Mien begeleiders Patrick van Wordragen, Patrick Caris en Ron Everaers, Tijn en zien alikke gevolg en eedereindae ich vergaete bin, unne hieële dikke merci vör dit prachtige avontuur!!!

Un herinnering vör ut laeve !!!